Големиот пожар кој зафати делови од Скопско кон Блаце и границата со Косово, се шири кон селата кои се поблиску до градот, а во моментов гори на три локации. Луѓето се организираат заедно со пожарникарите за да ги бранат од огнот црквите и манастирите во областа, јавуваат жители на селата и читатели на „Слободен печат“.

Според нив, три хеликоптери го гасат пожарот попладнево, а голема штета имало во селото Чучер. Загрозени се и Глуво, Бразда и повеќе други места.

Сведоците на ширењето на огнената стихија велат дека во повеќе села во областа буквално е неиздржливо од чадот, правот и пепелта кои се во воздухот, па еден дел од жителите, посебно оние кои имаат деца, ги напуштиле домовите.