По двата успешни концерти во МКЦ изминатиов месец, „Фанк шуи“ не застануваат со креативниот процес и активна промоција на нивниот авторски музички израз. Денеска премиерно го објавија новиот видеоспот за песната „FU_K SHUI“, на која работи екипата што успешно функционираше и досега.

Музиката на „FU_K SHUI“ здружено ја потпишуваат момците од „Фанк шуи“, а свој индивидуален печат оставаат Лука Ѓоргиевски, Михаил Намичев, Давид Николовски и Стефан Момиќ.

„Спотот е снимен целосно спонтано, адекватно на креативниот процес и снимањето на песната“, вели Лука за снимањето на спотот.

Песната ја снимиле во три обиди сите заедно, а мисијата била секој најдобро што може да го саботира својот пријател за да отсвири што полошо.

Исто како и на аудио снимката, спотот сам по себе си наложи за цел да се себеуништуваме, веројатно несвесно, но адекватно на повикот и стандардниот однос од околината. Главен позади камерата и одлуката за колоритот на овој акт на себе-саботажа се јавува Ѓорѓи Вацев, вели Лука.

Зад монтажата стои Михаил Намичев во придружба на Вацев, а корекциите и критичкото размислување за финиширање на самиот видеозапис паднал на грбот на Јане Билјановски, Лука Ѓоргиевски и Адо Лазаровски.

Видеоспотот е сниман со професионална камера и осветлување, а во придружба на професионалците од „КК Анималс Скопје“, Дарио Гроздановски и Анастасија Јаневска.

„Спотот е снимен во декември на -2 целзиусови степени, па од таму и психодрамата и фацијалните експресии кои лесно може да се помешаат со гнев. Инаку сѐ е од болка од ладно“, открива Лука.

„FU_K SHUI“ е уште едно креативно и уникатно музичко парче од „Фанк шуи“, на кое не се останува рамнодушен.