Реал Мадрид не успеа да ја одбрани титулата во Лигата на шампионите освоена минатата сезона кога славеше над Ливерпул.

По нерешените 1:1 во првиот натпревар на стадионот „Сантјаго Бернабеу“, на реваншот на „Етихад“ Манчестер сити убедливо со 4:0 ги совлада „кралевите“.

Првите два гола за Сити ги реализираше Силва во 23 и 37 минута, а асистент на првиот погодок беше Де Брујне.

Предноста беше зголемена на 3:0 во 76 минута, кога стрелаше Аканџи, а конечниот епилог беше поставен во самиот финиш (90+1`) преку Алварез по асистенцијата на Фоден.

Во големото финале „граѓаните“ ќе се соочат против Интер во Истанбул на 10 јуни. За Манчестер сити ова ќе биде второ финале во ЛШ во својата клупска историја, првото го имаше во 2021 година кога загуби од Челси.

Од друга страна миланските „нераѕури“ ќе ја бркаат својата четврта европска титула, последната ја имаа во 2010 година со поранешниот македонски репрезентативец Горан Пандев.