Осумнаесетгодишна студентка од шкотскиот Универзитет Абердин и нејзината мајка оваа недела ќе отпатуваат во вселената, откако на наградна игра освоиле место на вториот комерцијален лет на „Вирџин галактик“.

Анастасија Маерс и нејзината мајка Киша Шахаф ќе бидат првите мајка и ќерка кои ќе летаат во вселената.

Тие исто така ќе бидат и првите луѓе од Карибите кои ќе тргнат на тој пат. Ќе полетаат од Ново Мексико в четврток.

Киша била на пат за Обединетото Кралство за да ја среди визата за ќерката за студиите во Британија, а на летот од Антигва за Лондон наеднаш ѝ се појавил оглас.

– Ја пополнив наградната игра и потоа одеднаш, неколку месеци подоцна, добивам дописи во кои пишува „вие сте меѓу 20-те најдобри финалисти“, потоа меѓу петте и на крајот дека сме победнички – рекла таа.

– Наеднаш, кој ми влегува во дворот? Ричард Бренсон. Цел тим едноставно влета во мојата куќа, велејќи „ти си победничка, одиш во вселената“ – додала Киша.

Анастасија вели дека нејзината одлука да отпатува од Карибите на студии во Шкотска довела до можноста да оди во вселената.

– Да не го одбрав Универзитетот Аберден и да не моравме да одиме по големиот заобиколен пат за да ја добиеме мојата виза – немаше да одиме на вселената – рекла таа.

Студентката, која е втора година на филозофија и физика, вели дека одењето на студии во Шкотска била една од најголемите одлуки во нејзиниот живот, но дека довела до тоа да се случуваат величествени работи.

Мисијата под назив „Галактик 02“ е втор комерцијален вселенски лет на „Вирџин галактик“, а прв со клиенти кои плаќаат. Огласената цена изнесувала 450.000 долари.

Првата мисија „Галактик 01“ беше спроведена во јуни и достигна висина од 85 километри. Се смета дека втората мисија ќе се обиде да оди по истиот пат.

Анастасија, која ќе биде втората најмлада личност што отишла во вселената, вели дека се надева дека тоа искуство ќе може да го искористи да инспирира други.

Киша додава: „Јас и мојата ќерка заедно во вселената, тоа е повеќе од остварување на сонот“.