Словенечката инди рок сензација „Џокер аут“, еден од најперспективните бендови во регионот, во неделата настапи на стадионот на АРМ во рамки на фестивалот „Скопје колинг“.

Вратите за концертот се отворија во 20 часот, а уште од првите моменти најверните фанови ги зафатија првите редови пред сцената. Видливо возбудени и со насмевки на лицата, младите обожаватели ја исчекуваа својата омилена словенечка петорка.

Концертот започна со „Не би смел“, а момците од „Џокер аут“ несомнено „не избегаа од близината“, напротив, во следните час и половина ѝ подарија на скопската публика вистинска доза чиста љубов и позитивна енергија.

Веднаш потоа, фронтменот Бојан Цвјетиќанин ѝ се обрати на публиката. Сподели дека ова им е веќе четврти настап во Македонија за само две години и се потсети дека пред три години ни самите не верувале дека некогаш ќе свират тука.

„Мислевме дека никој нема да дојде… а сега сме повторно тука, поради вас“, рече тој, додавајќи дека вечерта треба да се почувствува како роденденска забава, а тие се тука да свират за сите.

Младите Словенци ја „запалија“ сцената со динамичната „Пластика“, енергичната „Демони“, како и „Музика за децу“, која беше дочекана со одушевување и громогласно пеење.

„’Музика за децу’ е напишана како критика за владите кои го уништуваат овој свет. Вие сте тие луѓе кои можат да го променат светот на подобро“, рече Цвјетиќанин, потсетувајќи дека музиката не е само забава, туку и алатка за промена.

Настапот продолжи со низа хитови со кои „Џокер аут“ ја освои публиката во изминатите неколку години – „Токио“, „Стефани“, „Она“, „Ако тога више нече бити“, „Катрина“, „Шта бих ја“.

Сепак, она што им го трасираше патот до ѕвездите беше нивниот настап на Евровизија во 2023 година со песната „Carpe Diem“.

„Тоа што една Евровизија ни помогна да дојдеме тука и вие да сте тука вечерва, тоа не го сфаќаме толку едноставно“, рече пејачот пред да ја изведат евровизиската песна.

 

Еден од најемотивните моменти на вечерта беше кога Цвјетиќанин, голем обожавател на Тоше Проески, приреди вистинско изненадување и совршено ја испеа „Тајно моја“ на македонски јазик, нешто што публиката го дочека со аплаузи.

Во еден момент, членовите на бендот се симнаа меѓу публиката и оттаму ја изведоа „Умазане мисли“, создавајќи неповторлив спомен што обожавателите ќе го носат долго со себе.

Концертот заврши со веење на македонското знаме на сцената и со топло ветување дека наскоро повторно ќе се вратат во Скопје.