Џенифер Кулиџ, ѕвездата на „Белиот лотос“, повторно беше во центарот на вниманието на доделувањето на наградите Еми 2025 во Лос Анџелес, каде што ја освои публиката со својот хумористичен говор додека ја доделуваше наградата за најдобра главна женска улога во комедија.

Како минатогодишна победничка, таа ја искористи можноста да се пошегува на своја сметка на сцената.

Пред да ја објави Џин Смарт од „Хекс“ за победничка, Кулиџ се осврна на своето искуство по освојувањето на наградата.

„Можам да ви кажам од искуството со освојувањето на оваа награда, не е толку одлично како што изгледа. Навистина не е. Се зближив многу со моите колеги номинирани, особено откако победив, но сум прилично сигурна дека ме отстранија од групниот разговор“, рече таа, предизвикувајќи смеа кај публиката.

Таа продолжи во иста насока, споменувајќи го популарниот лек за слабеење „оземпик“.

„Сите требаше да одиме на патување на Ибица, а јас открив дека не сум на него. И единствената причина зошто го знаев тоа беше затоа што Елизабет Дебцики и јас имаме ист дилер на ‘оземпик’, и знаете, барем нејзиниот работи“, се пошегува актерката.

„Сега кога размислувам за тоа, освојувањето на Еми е веројатно најлошото нешто што ми се случило“, заклучи таа, објавувајќи ги номинираните.

Кулиџ беше една од многуте презентери на ова доделување на награди, заедно со Кети Бејтс, Сидни Свини, Стивен Колберт, Лорен Греам, Алексис Бледел, Џена Ортега, Кетрин Зета-Џонс и други.