Околу 200 жители на селото Глуво во Скопско, на кое му се заканува огромниот пожар на повеќе локации, вечерва се организирале и самите, користејќи лопати, со натчовечки сили успеале да спречат пожарот да се прошири врз куќите во селото Глуво. Тие за „Слободен печат“ раскажуваат дека го изгаснале огнот на повеќе ридови околу селото, кој се заканувал да им ги проголта куќите.

Вечерва пожарот и натаму беснее на повеќе места, а жителите велат дека откако се стемнило, хеликоптерите престанале да летаат, додека огнот заедно со нив го гаснат пожарникари со само едно противпожарно возило.

Локалните жители се организирале и копаат со приватни багери и камиони во обид да го спречат огнот. Тие апелираат за каква било помош и велат дека ќе бидат будни и подготвени се додека пожарот не биде изгасен.