Диви трки се организирани викендов на автопатот меѓу Табановце и Куманово, а полицијата, иако излегла на терен да провери, не ги нашла безобѕирните тркачи кои се снимени како го загрозуваат сообраќајот, пишува ТВ „21“.

Видеото кое го објави телевизијата е снимено околу полноќ во ноќта меѓу петокот и саботата, на автопатот меѓу Табановце и Куманово. Според сведоци на ноќното дивеење, трките меѓу повеќе автомобили траеле повеќе од еден час. Од полицијата велат дека не успеале да ги најдат возачите кои се тркале на јавен пат.

„По пријава до СВР Куманово за одржување на диви трки на автопатот А1 на делницата од Табановце кон Куманово, поточно на крстосницата кај Крива Паланка, Единицата за мобилна безбедност во сообраќајот изврши патрола на наведената делница од 00:40 до 01:40 часот наутро, при што не беа забележани возила поврзани со пријавениот настан на диви трки“, велат од МВР.

Полицијата годинава привремено одзеде десетина автомобили кои биле користени за диви трки во Скопје.