Директорот на „Канал 5“ телевизија Иван Мирчевски, преку видео-врска во живо се вклучи во емисијата „Само вистина“ и го избрка гостинот, Исмет Рамадани, претседател на Евроатлантски совет и советник во Владата.

Испровоциран од излагањето на Рамадани кон новинарот Александар Видиновски, кого Рамадани го обвини дека во емисијата често дозволувал дискриминаторски и навредливи ставови кон Албанците, Мирчевски се вклучи во живо во емисијата и директно му се обрати на Рамадани.

– Господине Исмет Рамадани, не се познаваме лично. Во медиумите работам долго време, но не сум видел ваков однос кон новинар и медиум во мојот живот. Прво, правите директна сегрегација во општеството. Во „Канал 5“ никој никогаш не прави поделба на луѓето ниту во Македонија ниту во светот на верска и етничка основа. Најмалку во „Канал 5“ имате право да кажете, особено не на мојот ценет колега Александар Видиновски дека ги потенцира Албанците со намера да ги навреди нашите сограѓани. За мене во Македонија сите сме Македонци. Етничката припадност ниту мене, ниту некому друг во „Канал 5“ не му е приоритет. Ако не верувате, дојдете во „Канал 5“ да видите колку луѓе од друга верска припадност работат во телевизијата. Имам одвоено и посебна соба за исламски верски обреди внатре во телевизијата, за времето кога моите колеги кои се од исламска вероисповед, имаат потреба интимно да му се обратат на својот креатор Алах. Ве молам да не ширите сегрегација и веднаш барам од вас да му се извините на мојот колега и никогаш повеќе да не го направите ова. Јас имам браќа Албанци, не по крв, туку по душа. Тоа што го направивте вечерва во „Канал 5“ нека ви служи на чест. Ако не се извините ќе поднесам секакви писмени поднесоци до сите странски амбасади. Ова не е човечно. Срам да ви е, не ви служи на годините и на позицијата, му рече Мирчевски на Рамадани.

На ова гостинот во студиото, неприфаќајќи го кажаното, одговори:

– Немој да се правиш многу важен и попаметен и умерен од мене. Ти мене ќе ми кажуваш какви односи имам јас со Македонците, а ти какви со Албанците. Му велам на новинарот да реагира на националистички настапи. Имаше настап тука „да се згмечат Албанците, ќе ги згмечиме“, одговори Рамадани.

Потоа Мирчевски побара веднаш да се прекине емисијата, а Исмет Рамадани да го напушти студиото што и се случи.