Откако вчера од МВР ги демантираа изјавите за „наводно недавање дозвола од страна на Министерството за внатрешни работи за санација на оградата на мостот Гоце Делчев“ и ги известија граѓаните дека оградата на мостот е веќе санирана, денеска „Слободен печат“ забележа дека екипи на Град Скопје повторно ја доработуваат „закрпената“ и, како што тврдат, санирана заштитна ограда.

Всушност, според вчерашните инсерти на нашиот камерман, оградата беше подзацврстена со анкери онаму каде можела да се прикрпи, а пред неа во делот каде што недостасуваше банкина е поставена нова, за да се зголеми безбедноста на возачите и пешаците под мостот.

Сепак, екипи на ЈП „Улици и патишта“ утрово повторно беа зафатени со вршење поправки на оградата на мостот „Гоце Делчев“, за која „Слободен печат“ неколку пати ја предупреди јавноста во текот на изминатата недела. Неколкумина работници ја буткаа, ја влечеа и се мачеа да ја доведат во ред оштетената железна ограда.

По апелот од МВР за транспарентно информирање на јавноста со проверени и точни информации од страна на медиумите, дали денешната нова работна акција на градските служби на заштитната ограда од мостот „Гоце Делчев“ која може да ја проследите на видеото што е подоле, го „демантира“ демантот на Министерството дека санирањето на оваа локација е завршено и ја потврдува вчерашната наша објава дека оградата не е целосно санирана, туку површно закрпена.

Како денеска повторно се работеше на овој патем „решен“ проблем од страна на екипите на ЈП „Улици и патишта“, од каде патем нема никакви информации ниту одговори на нашите прашања, погледнете на видеото и фотографиите во прилог.