Првото полициско куче од расата корги во Кина го привлече вниманието на јавноста затоа што направи голема грешка додека беше на должност.

Фуцаи, куче старо една и пол година во центарот за дресура на полициски кучиња во Вејфанг, покраината Шандонг, е познато не само по своите способности за откривање експлозиви, туку и по својата палава природа, пишува „Јуроњуз“.

Тренерот на полициски кучиња, Жао Чиншуаи, го препознал неговиот талент кога имал само два месеци, а Фуцаи официјално станал член на полициските редови во октомври 2024 година, откако успешно ја завршил обуката за откривање експлозиви, проверка на возила и надминување пречки.

Оттогаш, тој учествувал во бројни безбедносни операции, вклучувајќи го и обезбедувањето на фестивалот на змејови, како и во активности насочени кон приближување на полицијата до заедницата.

Сепак, неговата кариера не поминува без проблеми. Во јануари, тој беше дисциплиниран откако беше фатен како спие на должност и мокри во сопствената чинија за храна, поради што накратко остана без своите омилени слатки и играчки.

Дури и тогаш, се чинеше дека граѓаните не беа лути, бидејќи полициската управа во Вејфанг забележа пораст на популарноста на социјалните медиуми со над 400.000 нови следбеници. Сега Фуцаи направи многу полош прекршок.

Во април, за време на редовна патрола, тој украл парче колбас од рацете на едно девојче, а тој момент дури бил снимен и стана вирален.

Иако мајката на девојчето подоцна им изјави на медиумите дека детето не било вознемирено и дека со задоволство го изела остатокот од колбасот, тренерот на Фуцаи, Жао, јавно се извини и најави построга контрола на исхраната на неговито колега, објавија локалните медиуми.

„Фуцаи го прекрши правилото да не се зема ништо од граѓаните“, рече Жао и вети дека ќе работи на совладување на своите импулси.

Покрај тоа, тие заедно ја посетија градинката што ја посетува девојчето и им донесоа на децата колбаси, подароци со мотиви од корги и змеј, како знак на извинување.

„Се надевам дека и Фуцаи и мојата ќерка ќе пораснат здрави и среќни. Издржи, Фуцаи“, рекла мајката на девојчето.