Кралицата на македонската народна песна, Виолета Томовска заедно со со популарното дуо Дац и Александар, ја преработија „Заиграј со мене ти”. Песната е веќе хит на радио станиците и се емитува на тв екраните.

Ова распеано трио вчера на 19 декември ја израдуваа публиката со убав предновогодишен музички подарок. Дац и Александар велат дека одамна во нив тлеела желбата да снимат нешто со кралицата на македонската народна музика, Виолета и се воодушевени од нејзината младешка енергија и гласот што ја држи, а тоа се покажало во текот на снимањето на аудио и видео материјалот.

„Конечно успеавме Виолета да ја вратиме на сцената на големо воодушевување на публиката, на пиедесталот што и тоа како го заслужува. Како воопшто да не старее и полна е со животна енергија и позитива, па дури се појави и запеа со нас како наша гостинка во вторникот во полната „Трибека” во доцните часови“, велат тие.

Преработката со „заразен” ритам на „Заиграј со мене ти” со нов аранжман на Митевски и неговите колеги е направена во чест и сеќавање на големиот маестро Милан Завков (кој е автор на музиката на оваа вечна песна) и текстописецот и исполнител на песната, Виолета Томовска која наскоро ќе прослави 80 години.

Оваа идеја се реализираше и со голема поддршка од семејствата на Милан и Виолета. Хармониката ја отсвири Мишел Трајковски во манирот на маестро Завков, а вклучени беа и гитаристите Ташко Грујовски, Бобан Василески и трубачот Диме Танчев.

Текстот и мелодијата на “Заиграј со мене”, преоблечени во ново руво денес звучат исто така свежо и актуелно и носат убава порака и добро расположение за празниците кои се пред нас.

Уживајте и споделете ги нивните желби за здравје и љубов за сите во 2025 годинa!