Во пресрет на Велигденските празници, музичкото дуо Дац и Александар повторно ја изненадија јавноста – овојпат заедно со врвниот оперски тенор Благој Нацоски.

Во спонтана атмосфера, тие го создадоа новото видео и музичко парче „Серенада“, кое веќе ги освојува социјалните мрежи и ги допира срцата на луѓето.

Нацоски по тој повод доби симболична патна исправа од дуото, наречена „Љубовен пасош“ – признание кое, како што велат Дац и Александар, го добиваат „луѓето кои ја шират љубовта, добрата енергија, разбирањето и ја ставаат Македонија на светската мапа со своите дела“.

Соработката не е случајна и потекнува уште од времето на пандемијата, кога се запознале онлајн преку пријателката Оливера од Венеција и од тогаш триото гради музичка хемија. Тогаш го снимија италијанскиот римејк на „Уште ми фалиш“, а секое ново доаѓање на Благој во Македонија е нов повод за креативна средба. Овојпат, средбата се случи во пауза меѓу оперските проби на Благој, во студиото на Дац и Александар. Таму, спонтано, се роди идејата да ја оживеат македонската класика „Серенада“ во чест и сеќавање на Гоце Николовски, и авторот Мичо Божиновски.

Благој Нацоски за „Слободен печат“ изјави какво е искуството кога една обична дружба ќе премине во “Серенада”.

– Сѐ почна како обична дружба, а заврши како „Серенада“! Со моите драги пријатели, Дац и Александар, инспирацијата не ја бараме – таа нè наоѓа нас.

При мојот престој во Скопје, една вечер, сосема спонтано, отидов на кафе кај Александар во неговото студио – и наместо кафе, снимивме песна! Во рок од 5 минути ја снимивме македонската верзија на вечната „Серенада“ на Гоце Николовски – игра на зборови, музика и моментална инспирација. А потоа, Александар со блесок во очите рече: „Ајде и италијанска верзија!“ Јас, без двоумење, веднаш ја преведов и така добивме уште едно музичко бебе, овој пат со италијански акцент.

Од шега, направивме уметност – и сега „Серенадата“ живее на два јазици, но со едно срце, односно со три срциња – вели Нацоски.

„Снимивме во еден здив, за многу кратко време…“, велат Дац и Александар.

Резултатот е видеото од студиската сесија, кое веќе кружи на интернет и инспирира лавина од позитивни реакции. Со топлина и емоција, оваа верзија на „Серенада“ нуди токму она што денес ни е најпотребно – мал зрак на надеж.

„Ние  ја продолжуваме нашата мисија – да праќаме љубов преку песната, да потсетуваме на големите македонски автори и да му нудиме на народот нешто што ќе го израдува, дури и во овие сиви времиња“, велат Дац и Александар.

Слушнете ја „Серенада“ – не само како песна, туку како подарок за душата.