Потпретседателката на СДСМ, Ана Чупеска, на денешната прес-конференција упати јавно барање до претседателката Гордана Сиљановска-Давкова да не ги потпишува указите за измените на законите за полиција и внатрешни работи.

Според неа, новите законски решенија му даваат неограничена моќ на министерот за внатрешни работи, овозможувајќи му да именува началници и директори без никакви критериуми, искуство или стаж. Таа додаде дека со тоа се укинува професионализмот во МВР и се отвора простор за поставување на партиски кадри, па дури и лица со криминално досие.

„Ова од причина што Власта, со неверојатна лежерност, протурка скандалозни и опасни измени, кои го укинуваат професионализмот во полицијата и неа ја претвораат во партиски инструмент на принуда, или милиција која ќе биде под директна команда на министерот за внатрешни работи“, додаде таа.

СДСМ предупреди и на сериозни повреди на европските стандарди, особено во однос на биометриското следење без соодветен надзор, како и на укинување на регионалните центри за гранични работи — што, според партијата, е опасен потег со последици и за меѓународната соработка, особено со ФРОНТЕКС.

„Ова не е реформа, туку манифест на авторитаризам“, изјави Чупеска и најави дека СДСМ ќе ги извести сите релевантни меѓународни институции, вклучувајќи ги и ЕУ, САД, ОБСЕ и Советот на Европа.

СДСМ бара претседателката Сиљановска да застане на страната на уставноста, демократијата и професионалната полиција, и да не дозволи воспоставување на, како што велат, полициска држава.