Кошаркарите на Бостон Селтикс со убедливи 101:134 го совладаа Сан Антонио во новогодишното издание во НБА лигата.

Славниот клуб од Америка го запиша 26-тиот триумф во сезоната, додека избраниците на Грег Попович останаа на само пет победи во сезоната. За нив ова беше 27-ми пораз.

Џејсон Тејтум со 25 поени, шест скока и две асистенции го предводеше Бостон, додека зад него следуваше Џејлен Браун со еден помалку. Кристапс Порзингис ја заврши средбата со 14 поени и девет скока, додека Дерик Вајт уфрли 17 поени. На спротивната страна Девин Васел постигна 22 поени, додавајќи четири скока.

Лејкерси одново потфрлија и забележаа висок пораз од Њу Орлеанс со 129:109. Победата Пеликанси ја обезбедија уште во првото полувреме во кое немилосрдно ги казнуваа грешките на „езерџиите“. На паркетот најдобар беше Леброн Џејмс со 34 постигнати поени, Инграм и Вилијамсон во победничкиот тим уфрлија по 26 поени.