Го победи Реал Мадрид на гостински терен, па ремизираше со Интер, а вечерва како домаќин Шахтјор Доњецк целосно потфрли. Во третото коло од групата „Б“ во Лигата на шампионите украинскиот претставник загуби доста убедливо со 0:6 од Борусија Менхенгладбах.

За Германците ова е прв триумф во групната фаза, уште во првото полувреме ги решија сите дилеми, Плеа двапати се запиша во листата на стрелците, Бондар си постигна автогол, а пред паузата за четврти погодок на бундеслигашот се погрижи Бенсебаини.

Петтиот гол во домашната мрежа се случи во 65 минута, а Плеа после асистенцијата на Турам во 79 минута од средбата го комплетираше хет-трикот.

Во истата група од 21.00 часот силите ќе ги одмерат Реал Мадрид и Интер во дербито на рундата. На табелата води Борусија (М) со пет бода, пред Шахтјор (Д) со четири, два имаат миланските „неро-аѕурите“, а последни се „кралевите“ (еден).

Беше одигран уште еден дуел, во групата „А“ ремизираа Локомотив Москва и Атлетико Мадрид (1:1). Хименез во 18 минута обезбеди предност за „јорганџиите“, но бод за Русите донесе Миранчук од пенал во 25 минута на „РЗД“ Арената. Од 21.00 часот актуелниот европски шампион Баерн Минхен му гостува на Салцбург. На табелата води баварскиот гигант со шест бода, пред Атлетико (М) со четири, следуваат Локомотив Москва (два) и Салцбург (еден).