Барселона и Интер вечерва го одиграа еден од најдобрите натпревари во Лигата на шампионите сезонава ремизирајќи 3-3 во првиот полуфинален натпревар од Лигата на шампионите.

Гол видовме уште од првата шанса на натпреварот кога Турам го искористи нафрлувањето од Дамфрис и со пета ја затресе мрежата на Шчесни.

По голот на Интер, Барса тргна по израмнување и повеќе напаѓаше. Сепак, мрежата на полскиот чувар на мрежата се тресеше и вторпат. Дамфрис најдобро се снајде во една мешаница и зголеми на 0-2 во 21. минута.

Само три минути подоцна на сцена стапи Ламин Јамал кој по еден соло продор одлично шутираше и го матираше Зомер. Барселона и во наредниот период беше многу подобар противник, Јамал ја погоди и пречката.

За 2-2 се погрижи Феран Торес во 38. минута и тоа беше резултатот со кој се замина на паузата.

Второто полувреме донесе нешто помирна игра, а видовме уште два погодоци. Домаќините продолжија да имаат повеќе од играта, меѓутоа одново „нероаѕурите“ беа тие кои стигнаа до водство. Дамфрис по голот  и асистенцијата и по вторпат се запиша во листата на стрелци во 64. минута за предност на Интер од 2-3.

Сепак, радоста на италијанскиот тим кратко траеше. Само една минута подоцна Рафиња шутираше, а топката од пречката заврши во грбот на Зомер и во мрежата за 3-3.

Најголемата шанса во продолжение ја имаше Јамал кој уште еднаш ја погоди пречката од голот на Зомер.

Реваншот кој ќе го даде патникот во финалето се игра за седум дена на „Џузепе Меаца“.