Баер Леверкузен по 22. коло во Бундеслигата е уште еден чекор поблиску до титулата во Германија бидејќи Баерн Минхен денеска беше поразен на гости кај Бохум со 3:2.

Не изгледаше дека ќе видиме изненадување во денешниот натпревар откако Мусиала по само 14 минути донесе водство за Баерн. Меѓутоа тој гол не го откажа денес храбриот Бохум, па така Асано во 38. минута донесе изедначување. Во завршницата од првиот дел, шест минути подоцна следуваше шок за Баерн кога Шлотербек ја погоди мрежата на Ноер за 2:1.

Тргна Баерн офанзивно во вториот дел, создаваше шанси, но изостануваше реализацијата. Упамекано во 78. минута направи пенал и доби втор жолт картон, па предвреме го заврши натпреварот. Реализатор на најстрогата казна беше Стогер. Хари Кејн во 87. минута ја врати надежта на Баерн дека може да го избегне поразот, но тоа не се случи.

На табелата Баерн остана на 50 бода, додека Леверкузен има осум повеќе на врвот и со оглед на моменталната форма треба чудо да се случи избраниците на Чаби Алонсо да ја испуштат оваа огромна предност. За Баерн ова беше трет пораз во низа во сите натпреварувања откако во минатото коло изгубија токму од Леверкузен, а кон средина на неделата беа поразени и од Лацио во Лигата на шампионите.