Александар Димитријевиќ е избран за нов генерален секретар на СДСМ. Димитријевиќ е актуелен советник во Гази Баба, а претходно бил и потпретседател на младинската организација на партијата.

За потпретседатели на партијата Централниот одбор ги избра поранешната министерка за животна средина Каја Шукова, Менде Илиевски – член на Советот на општина Битола, професорката од Правниот факултет во Скопје Ана Чупеска и Кристина Костова – член на ЦО на СДСМ.

– Не го познавам Александар Димитријевиќ и не знам колку е способен, но неговиот избор се чини како најлогичен, споредбено со другите. Тој е кадар кој потекнува од базата на СДСМ, предност којашто тешко дека ќе ја пронајдете кај другите раководни лица во партијата. Тој бил потпретседател на СДММ, а бил активен и во општинскиот одбор на СДСМ во Општина Гази Баба. Што се однесува до другите функционери кои синоќа беа избрани, најзвучно е името на универзитетската професорка Ана Чупеска, која во последниот период беше чест коментатор на днево-политичките настани и ќе биде интересно сега да биде видена како претставник на СДСМ – вели новинарот на Слободен печат, Срѓан Ивановиќ.