Домаќините на овој Мундијал, Хрватска и Данска заедно со Франција и Португалија ги поминаа четвртфиналните пречки и ќе се борат за медалите на Светското ракометно првенство.

„Бразилците на индивидуален квалитет се обидуваа да играат рамноправно со домаќините Данска, но не успеаја во својата намера и на крај загубија со значителна разлика. Португалците на натпреварот со Германија одиграа многу подобро од нивниот противник. Тактички беа поспремни. Германците се многу неиновативни на ова првенство. Сета игра им се заснова на индивидуален квалитет на Ушчинс и Кнор. Иако го имаат можеби најдобриот голман Волф кој ги одржуваше во текот на целиот натпревар, сепак не успеаја да влезат во друштвото кое ќе се бори за медали. Португалците на ова првенство можеби ја играат најдобрата одбрана. Агресивни, со многу движење, брза транзиција, лесни голови и заслужено се пласираа во полуфиналето. На претходните два четвртфинални натпревари, Хрватска и Франција низ иглени уши се пласираа во полуфиналето. Хрватите натпреварите ги добиваат поради домашниот терен, индивидуалниот квалитет и помошта од судиите. Французите со голема мака и тешка борба на теренот едвај ги победија Египќаните. Никој не очекуваше дека Египет може играчки да се носи со Франција која имам чувство дека го потцени противникот“, вели новинарот на Слободен печат, Стефан Крстески.