Адвокатот на првообвинетиот Љупчо Палевски, кому му се суди за убиствата на 14-годишната Вања Ѓорчевска и 74-годишниот Панче Жежовски денеска во изјава за медиумите негодуваше што неговиот клиент Љупчо Палевски беше отстранет од судницата, на барање на Кешишев. Причината што ја наведе Кешишев беше дека му е страв од Палевски а судот ја прифати.

-Кешишев никогаш немал страв од Палевски. Си прави драма, онака како што му е посочено да кажува, така прави. Ова е сценарио и уште еден циркуз во судењето, за да продолжи циркузот, рече адвокатот на Љупчо Палевски, Јовица Страшевски.

Страшевски вели дека и Велибор Манев и Боре Видевски се нелогични. Судот реши да го уважи барањето на Кешишев и да го отстрани Палевски од судницата за време на испрашувањето на Кешишев, со образложение дека Палевски му влијаел претходно на Кешишев и во негово присуство тој не би можел да ја зборува вистината.

-Кажуваат и двајцата дека ем биле таму, ем ништо не виделе. Како можеш да бидеш присутен а ништо да не видиш? Едниот дава еден исказ, другиот друг исказ. Јавно се гледа дека се монтирани и двајцата и дека зборуваат она што некој им го наметнал. Не може ни вие како јавност, ниту судот да поклонува верба на изјавата на Кешишев и на неговиот адвокат која е лажна. Имаме директор на затворот Скопје кој кажа дека е невозможно ни во комбе ни во затворот да се подаде некакво ливче. Бидејќи истите лица се максимално обезбедени, ставени се сами во самица, ги носат повеќе чувари. Ова е една лага а Кешишев треба самиот да се погледне и да каже што е вистината, рече Страшевски.