Стотици златни ретривери, собрани од Америка до Јапонија и Австралија, се собраа завчера во домот на првите примероци од својата раса – на шкотските гори.
На годинешната централна свеченост, низ звуците на шкотски гајди парадираа кучиња од Канада, САД, Нов Зеланд, Јапонија, Австралија, Германија, Романија, Чешка, Италија, Хрватска и Естонија, а потоа се дружеа самите во дворот на имотот Гисахан Хаус.

Првите златни ретривери ги одгледал лордот од Твидмаут, сер Дадли Марџорибенкс пред 155 години на својот имот Гисахан Хаус во Глен Африк. Шкотскиот аристократ внимателно вкрстувал раси за да создаде ловџиско куче што би му било пополезно на теренот на шкотските гори.

Кутрињата Прајмроуз, Кауслип и Крокус биле првите од својата раса, окотени од твид воден шпаниел, раса што повеќе ја нема. Дури во 1913 година златниот ретривер е официјално признаен за посебна раса. Во шеесеттите години имотот на лордот од Твидмаут почнал да се распаѓа.

Во негова чест, сопственици на златни ретривери со своите миленици на секои пет години во средината на јули ги посетуваат урнатините од имотот за да се дружат, да разменуваат искуства, да следат демонстрации и трибини, како и да учествуваат на вечерната парада.

– Целта на собирот е да се чува и споделува знаењето за расата, да се заштитат квалитетите и темпераментот на златните ритривери – вели Керол Хенри, секретарка на Шкотскиот клуб на златни ретривери. Таа укажа дека расата била загрозена од неодговорни одгледувачи, особено во периодот на рестрикции за време на пандемијата.