Трикратниот и актуелен шампион во Формула 1, Макс Верстапен, смета дека тој спорт е ги преминал сите граници што се однесува до бројот на трки во календарот пред стартот на новата сезона со рекордни 24 старта.

Холанѓанецот е фаворит за отворањето на сезоната во Бахреин, каде што претстојниот викенд ќе ја започне својата одбрана на титулата. Тој смета дека проширувањето на календарот е премногу.

– Од моја страна ова не е прифатливо. Јас сакам трки и често се тркам и надвор од Формула 1. Но, ако луѓето во овој спорт почнат да си ги скратуваат кариерите затоа што тоа е премногу за нив, тоа е срамота. Се надевам дека можеме да го промениме тоа во иднина – изјави Верстапен за новинарите во Бахреин.

Двократниот светски шампион Фернандо Алонсо, кој дебитираше во Ф1 во 2001 година, размислува како Верстапен.

– Кога почнав имавме 16 трки, а потоа станаа 18. Кога дојде Либерти медиа (сегашниот сопственик н.з.) објавија дека зголемуваат на 20 старта и тоа беше апсолутна граница. Сега сме на 24 и тоа не е добро за иднината. Дури и светскиот шампион мисли дека оваа сезона ќе биде долга. Замислете за нас останатите, ние одиме на трки во втората полусезона за ништо, немаме поттик да се бориме – рече возачот на Астон Мартин.

Сезоната 2024 година ќе биде најдолгата во историјата на Формула 1 со 24 трки. Претходниот рекорд беше 22 трки, минатата и предминатата сезона.