Независниот кандидат Венко Крстевски е избран за в.д. градоначалник на Кочани, со 9 гласа „за“, со поддршка од советниците на советничката група на СДСМ.

– Време е за обединување, време е за работа. Јас ќе бидам мост меѓу народот и институциите, а фокусот ќе ми биде на младите. Со чесна и ефикасна работа Кочани ќе биде убаво и хумано место за живеење, се со цел да се издигнеме од оваа апатија – изјави Крстевски.

Претходно, кандидатите за в.д. градоначалник имаа кратки образложенија на своите кандидатури, по што на седницата беа изнесени низа лични дискредитации и навреди за и меѓу предложените кандидати. Поради тоа претседателот на Советот, Лазо Митев даде едночасовна пауза.

Дали Венко Крстевски ќе биде в.д. градоначалник на Кочани?

Кристина Атанасова Арсова, советничка од ВМРО ДПМНЕ, чиешто дете е меѓу повредените во пожарот, низ солзи ја предаде оставката од функцијата. Образложи дека не прифаќа вакво политичко обвинување особено што и самата е засегната бидејќи нејзиното дете е едно од повредените во пожарот во дискотеката Пулс.

Во Советот на Општина Кочани има 19 членови, од кои девет се од ВМРО-ДПМНЕ, осум од СДСМ, еден независен и еден од Левица.

Советот на Општина Кочани денеска ја одржа 62. седница на која единствена точка на дневен ред беше избор на в.д. градоначалник по оставката на градоначалникот Љупчо Папазов, кој е еден од осомничените за пожарот во дискотеката „Пулс“ во која животот го загубија 61 лице, а околу 200 се повредени.

Кандидатура за в.д градоначалник на седницата поднесе Венко Крстевски, избран од група избирачи, додека од ВМРО-ДПМНЕ беше предложен координаторот на советничката група Гоце Марков.

Градоначалникот на Кочани поднесе неотповиклива оставка