Венецуела го зголеми извозот на нафта и нафтени производи во јуни, бидејќи загубата на американските и европските пазари беше компензирана со повисоки испораки во Кина, покажаа вчера податоците на превозните компании и документите на државните компании.

Вкупно 27 танкери ги напуштија територијалните води на Венецуела во јуни, носејќи просечно 844.000 барели нафта и нафтени производи дневно и 233.000 тони нуспроизводи и петрохемикалии, покажаа податоците. Ова значи дека венецуелскиот извоз на нафта и нафтени производи се зголемил за осум проценти во споредба со мај.

Во мај, Венецуела извезуваше просечно 779.000 барели нафта дневно и 329.000 тони нуспроизводи и петрохемикалии. На крајот на мај, Вашингтон одзеде група лиценци што им дозволуваа на партнерите на венецуелската државна нафтена компанија PDVSA, вклучувајќи ги американската „Шеврон“ и шпанската „Репсол“, да испорачуваат нафта и гориво до американските и европските рафинерии.