НБА подготвува историски чекор кон Европа – кошаркарската елита од Евролигата и фудбалските гиганти се дел од планот.

Кошаркарскиот свет е пред најголемиот шок во последните децении – во 2028 година НБА би можела да ја стартува својата европска дивизија. Меѓу учесниците, според првичните информации, ќе бидат најпознатите имиња од европската кошарка, но и сосема неочекувани засилувања од фудбалот.

Според новинарот на „Форбс“, Еван Сидери, европските кошаркарски великани Реал Мадрид, Барселона и Фенербахче ќе бидат основачи на новата НБА европска конференција, која треба да започне во 2028 година. Тоа би значело крај на Евролигата во нејзиниот сегашен формат и отворање на ново поглавје за европската кошарка.

Изненадувањето е уште поголемо со најавата дека Манчестер Сити и ПСЖ ќе формираат свои кошаркарски тимови и ќе се натпреваруваат во НБА Европа. Двата клуба планираат да ја искористат својата инфраструктура, маркетинг и масовна база на навивачи за да влезат на кошаркарскиот пазар со големи амбиции.

Овој проект би можел целосно да го промени европскиот кошаркарски пејзаж – од финансискиот модел и натпреварувачкиот календар, до статусот на играчите. Евролигата најверојатно ќе мора да го редефинира својот формат, а националните првенства би можеле да ги загубат најсилните клубови.

Официјалната најава се очекува до крајот на 2025 година, иако најголемите пречки би можеле да бидат логистичките предизвици со патувања и распоред. Дополнително, ФИБА би можела да се спротивстави, бидејќи новата лига ќе биде независна и водена директно од САД, без соработка со светската федерација. Познато е дека ФИБА со години е во судир со Евролигата, па не е исклучено да реагира и на новата НБА конкуренција.

Извор: https://sport.com.mk/