Британската влада е посветена на постигнување на целта што се очекува официјално да биде поставена во рамките на работата на Северноатлантскиот договор за издвојување 5 отсто од БДП за трошоци за одбрана, објави вчера премиерот Кир Стармер, во пресрет на самитот на Атлантскиот сојуз.

Повикувајќи се на заканата од Русија и под притисок од републиканскиот американски претседател Доналд Трамп, земјите членки на НАТО се подготвуваат да објават договор за ова во среда во Хаг, со хоризонт до 2035 година.

– Мораме да се справиме со ова време на екстремна неизвесност со агилност, брзина и јасна визија за националниот интерес, со цел да ја гарантираме безбедноста на населението – рече лабуристичкиот премиер Стармер, според соопштението за медиумите издадено од неговите служби.

– Затоа се обврзав да потрошиме 5 отсто од БДП за национална безбедност. Ова е можност да ја продлабочиме нашата посветеност кон НАТО и да ги зголемиме инвестициите во пошироката безбедност и отпорност на нацијата – додаде тој.

Зголемувањето на трошоците за одбрана што се очекува да го објават сојузниците е поделено на распределба на најмалку 3,5% од нивниот БДП за воени трошоци stricto sensu и дополнителни 1,5% за трошоци за безбедност во поширока смисла (кибербезбедност, мобилност на воени средства итн.).

Ова зголемување, кое се преведува во стотици милијарди евра, го бара републиканскиот претседател на САД, Трамп, заканувајќи се дека во спротивно нема да ги брани „непочитувачите“ – без разлика што вели Член 5.

Генералниот секретар на НАТО, Марк Руте, верува дека овој „квантен скок“ во трошоците за одбрана и безбедност е „фундаментален“ за да се обезбеди иднината на алијансата, особено во услови на закана од Русија.

Во февруари, британската влада вети дека ќе го зголеми буџетот за одбрана на земјата на 2,5% од БДП до 2027 година, а потоа на 3% по 2029 година.