Санираниот хидросистем Ѓавато, со кој Дојранското Езеро се снабдува со вода, денеска ќе биде пуштен во употреба. Како што е најавено, на свеченоста ќе присуствуваат првиот заменик-претседател на Владата и министер за животна средина и просторно планирање Изет Меџити и пратеникот во Собранието Миле Цеков.

Градоначалникот на Општина Дојран, Анго Ангов во четвртокот соопшти дека општината и официјално, преку системот е-Влада, испратила информација до Владата со која се бара итно постапување за санација и пуштање на хидросистемот и таа е ставена на дневен ред на седница на Владата.

Тој ги покани граѓаните на најголемата еколошка акција за чистење на крајбрежјето на Дојранското Езеро, која се одржа вчера.

„Да ја покажеме грижата за Дојранското Езеро, а со ова, исто така, да испратиме силна порака до надлежното Министерство за животна средина дека хидросистемот „Ѓавато“ мора да биде пуштен. Се надеваме на позитивен исход и разбирање. Затоа сите заедно, сплотени, без какви било поделби, да го покажеме единството и да испратиме силна порака за нашиот бисер – Дојранското Езеро“, напиша Ангов.

Инаку, градоначалникот на Дојран ја лоцираше одговорноста за нефункционирањето на хидросистемот за полнење на Дојранското Езеро во Министерството за животна средина и во повеќе наврати испрати барања во кои се наведува итноста од пуштање во употреба на хидросистемот Ѓавато.

Според вчерашните мерења на УХМР, нивото на водата во Дојранското Езеро е 80 сантиметри под договорениот минимум.