Според извештајот на „Њујорк тајмс“, Соединетите Американски Држави нема да испратат официјална делегација на вториот круг преговори меѓу Русија и Украина, закажан за 2 јуни 2025 година во Истанбул.

Оваа изненадувачка објава предизвика многу шпекулации особено на Запад, бидејќи Вашингтон игра клучна улога во поддршката на Киев, и воена и политичка.

Одлуката дополнително покрена прашања за идната стратегија на САД во однос на мировниот процес и нивните реални намери кога станува збор за украинскиот конфликт. Во светло на оваа одлука, специјалниот пратеник на Доналд Трамп, Кит Келог, потврди дека на состанокот сепак ќе бидат присутни советниците за национална безбедност од Германија, Франција и Велика Британија, нагласувајќи ја важноста на европските сојузници во процесот.

Дали администрацијата на Трамп ја префрла одговорноста на Европа?

Според извештајот на Ројтерс, одлуката на САД е дел од поширокиот план на администрацијата на Доналд Трамп да ја предаде главната одговорност за преговорите на европските партнери, додека САД ќе го задржат влијанието од сенка.

Келог претходно во интервју за Еј-би-си Њуз изјави дека САД се подготвени да разговараат за безбедносните грижи на Русија, особено кога станува збор за проширувањето на НАТО кон Исток, но додаде дека конечните одлуки се во рацете на претседателот.

Неговите зборови дека го „предупредува Киев“ да не ја отфрла можноста за дијалог, укажуваат на зголемениот притисок на Вашингтон врз украинското раководство да остане на преговарачка маса – дури и без директна поддршка.

Можно слабеење на позицијата на Киев

Блумберг е загрижен дека отсуството на американската делегација може да ја ослаби позицијата на Украина, која во голема мера се потпира на видливата и решителна поддршка на Западот за време на преговорите со Русија.

Без директно присуство на САД, руската страна би можела да има повеќе простор за дипломатски притисок, додека Европа би била принудена да преземе водечка улога – и политичка и безбедносна.

Резултатите од првиот круг и контекстот на средбата

Првата рунда преговори, одржана на 16 мај 2025 година, според извештаите на британската Би-би-си, не донесе значителен напредок во насока на трајно решение, иако беа договорени неколку хуманитарни мерки – вклучително и еднаква (1 за 1) размена на затвореници и не толку рамноправно предавање на телата на паднатите војници.

И покрај тоа, вториот круг на преговорите се очекува со посебно внимание, бидејќи може да отвори простор за посериозни разговори за прекин на огнот, територијални компромиси и иднината на Украина во безбедносните структури на Западот.

Повлекувањето на САД од претстојните преговори во Истанбул не е само тактичка одлука, туку потенцијален сигнал за поширока промена на американскиот пристап кон војната во Украина.

Како Европа, заедно со демократите од САД, ќе одговори на оваа промена и дали Киев „ќе остане сам во клучен момент“, останува да видиме.