Вашата мачка може да добие деменција: Внимателно следете ги знаците што може да укажуваат на болеста
Малкумина сопственици на мачки знаат дека, исто како и кај луѓето, и кај мачките може да се појави деменција. Ново истражување открива дека постојат бројни сличности меѓу човечката и мачешката деменција, вклучувајќи и начини на развој на когнитивното оштетување, пишува „Саенс алерт“.
Препорачано
Симптоми и препознавање
Мачешкиот когнитивен дисфункциски синдром, познат и како мачешка деменција, е состојба поврзана со стареењето, која се карактеризира со пад на когнитивните способности и промени во однесувањето. Најчесто се појавува кај постари мачки, но симптоми се забележани и кај животни млади само седум години.
Една студија покажала дека повеќе од половина мачки постари од 15 години покажуваат знаци на деменција. Кај оние меѓу 11 и 14 години, 28 проценти имале барем една промена во однесувањето што се поврзува со состојбата.
Најчести симптоми се:
- необично мјаукање, најчесто во текот на ноќта;
- промени во интеракциите со луѓето – зголемена „приврзаност“ или раздразливост;
- нарушен сон – будност навечер и спиење преку ден;
- нечистење надвор од кутијата за песок;
- дезориентација – губење насока, зјапање во ѕид, заглавување зад предмети;
- промени во активностите – помалку игра, намалено чистење и нега;
- анксиозност во познати ситуации;
- тешкотии со учење и меморија – заборавање каде е чинијата со храна.
Грижа и третман
Бидејќи симптомите на деменција се преклопуваат со други заболувања како артритис или бубрежни проблеми, задолжително е да се консултира ветеринар.
Лек за деменцијата кај мачките не постои, но можат да се преземат мерки за олеснување на симптомите и подобрување на квалитетот на животот. Кај благи случаи, игра, стимулирање со интерактивни играчки и мали промени во средината можат да го забават напредокот. Но кај потешки форми, премногу промени може да предизвикаат дополнителна збунетост и вознемиреност.
Исхраната може да помогне, особено додатоци со антиоксиданси (витамини Е и Ц) и омега масни киселини. Сепак, мора да се користат исклучиво препарати наменети за мачки, бидејќи некои супстанции во кучешките додатоци можат да бидат токсични.
Мачешката деменција е честа и тешка состојба, но раното препознавање и соодветната грижа може значително да го подобрат животот на вашето милениче. Важно е сопствениците да ги следат симптомите и да бараат совет од ветеринар, со цел нивната мачка да има достоинствено и квалитетно стареење.
