Полска во моментов не е подготвена за хипотетички воен конфликт со Русија, изјави Славомир Менцен, лидер на десничарската партија Конфедерација, според Политико.

„Апсолутно не сме подготвени за овој конфликт. Потрошивме десетици милијарди долари за оружје кое нема да го имаме за неколку години, а кога ќе го имаме, каква корист ќе ни направат?“, рече Менцен.

Според него, Полска го „преспала“ револуционерното зголемување на улогата на беспилотните летала во воените конфликти, што, според него, директно влијаело на текот на војната во Украина. Истиот став го делат и некои воени експерти во Полска, кои предупредуваат дека земјата заостанува во модернизацијата на оружјето и одбраната.

Изјавите на Менцен доаѓаат во време на зголемена тензија во регионот. Полскиот премиер Доналд Туск објави на 10 септември дека полскиот воздушен простор бил нарушен во текот на ноќта. Претставничката на Министерството за внатрешни работи, Каролина Галецка, потврди истиот ден дека остатоците од 12 беспилотни летала веќе се пронајдени на полска територија.

Официјална Варшава постојано нагласува дека очекува дополнителна поддршка од сојузниците на НАТО во зајакнувањето на одбранбените капацитети, особено во светлината на сè почестите инциденти поврзани со беспилотни летала.