Eкипата на Вардар утре на домашен терен го игра првиот натпревар од квалификациите за Конференциската лига, а противник ќе биде екипата на Ла Фиорита од Сан Марино.

Пред утрешниот натпревар стратегот на Вардар, тренерот Гоце Седлоски денеска одржа прес-конференција на која присутвуваше и напаѓачот Азер Омерагиќ. За Вардар овој натпревар е враќање на европската сцена по пауза од седум години.

„Одработивме добри подготовки во овие месец дена, дома и во Словенија, каде добро се подготвивме. Иако ни недостасуваа некои од странците, сите сме максимално спремни. Вардар нема играно во Европа подолго време. Знаеме каков ривал не очекува, но ние се гледаме самите себе, респект за ривалот, но јас сум фокусиран само на моите играчи. Се надевам дека ќе одиграме квалитетен натпревар и дека ќе забележиме победа. Во денешниот фудбал нема фаворити, затоа ќе бидеме внимателни. Ланската година Ла Фиорита исфрли ривал од Белорусија. Најважно ми е екипата да ми влезе онака како што јас барам, без опуштање. Ова е само прво полувреме, мора да бидеме концентрирани, максимално професионално, најважно ми е ние како ќе одиграме. За седум дена имаме и реванш. Ги анализиравме колку што можевме, видовме и добри работи и лоши работи од нив. Најважно ми е мојата екипа да влезе во мечот како што треба“, изјави Седлоски.

Според Омерагиќ Вардар е подобра екипа од Ла Фиорита, меѓутоа таа улога ќе треба да се оправда и на терен.

„За изминатите месец дена максимално се подготвивме. Мотивира настапот во Европа. Првиот меч го играме дома и ќе гледаме да си ја завршиме задачата на домашен терен, па да имаме мирен реванш. Ние сме доста подобра екипа од противникот од Сан Марино, но го почитуваме. Ќе притиснеме уште од самиот старт затоа што играме дома, мора да тргнеме со повеќе притисок. Ја сакаме победата пред нашата публика“.

Натпреварот започнува во терминот од 20:30 часот.