Ван Дајк во 2018 година пристигна во Ливерпул за тогаш рекордни 75 милиони фунти од Саутемптон, а минатата година беше еден од најзаслужните за триумфот на „црвените“ во Лигата на шампионите, додека оваа сезона е вистински лидер на одбраната во походот кој титулата во Премиер лигата.

Холандскиот репрезентативец минатата година за влакно остана без Златната топка која на крајот заврши во рацете на Лионел Меси.

– Доколку морам да го изберам најдобриот стопер во историјата на Премиер лигата, би го избрал Ван Дајк. Малку е чудно бидејќи не е толку долго дел од Премиер лигата како Џон Тери, Рио Фердинанд и останатите кои играа далеку подолго  – вели Компани кој сега е играч и тренер на белгискиот Андерлехт.

Поранешниот капитен на „граѓаните“ објаснува зашто се одлучи за Ван Дајк.
– Неговото влијание на екипата е големо, одбранбениот фудбалер освен на својата игра мора да мисли и на комуникацијата со останатите соиграчи и на тоа како тимот да го направи поцврст, подобар. Ливерпул пред Ван Дајк и со него се две сосема поинакви екипи.