Утре Еурофарм Пелистер го чека натпревар против дански Архус кој гостува во салата „Боро Чурлевски“

Во саботата Еурофарм Пелистер победи против Пролет со еден разлика, а тренерот Ларс Валтер е свесен дека неговата екипа во тој дуел не беше на потребното ниво и многу лесно можеше да се случи Пролет да го изненади вицешампионот.

„Ако го гледавте натпреварот против Пролет, не сме баш спремни за Европа, затоа што игравме екстремно лошо. По десет дена без шест репрезентативци малку нарушен ни е ритамот, па затоа работиме денес и утре да се поправиме. Веќе денес тоа изгледа подобро и наша цел во вторник е победа“, изјави Валтер.

Архус е осмопласиран тим во данското првенство, меѓутоа тоа не треба да ги залажува битолчани поради квалитетот на данското првенство.

„Видов многу натпревари на Архус оваа сезона. Не знам дали имаат проблеми, затоа што загубија многу натпревари со еден-два разлика. Во Данска секој од шеснаесетте екипи во Првата лига може секого да победи. Можеби имаат премалку бодови, но тие се добра екипа. Играа многу брзо и мора да бидеме подготвени. Кога нашите навивачи се тука и ќе ја исполнат оваа сала тие се секогаш во форма и можеме да научиме нешто од нив. Извонредно е тука и едвај чекам да ја почувствувам таа атмосфера.“, додаде 57-годишниот стратег.

Натпреварот на македонскиот и данскиот претставник ќе го водат германските судии Фабиан Баумгарт и Саша Вајлд.