Еурофарм Пелистер утре на домашен терен го чека натпреварот последниот натпревар од групната фаза од Европската лига, а противник ќе биде тимот на Мотор Запорожје.

За пласман во следната фаза на битолчи доволно ќе им биде и реми бидејќи се четврти со еден бод повеќе од Мотор. Добро за „пелистерци“ е што тренерот Ларс Валтер на располагање по подолго време ќе има поширок ростер.

„Ако имаме поддршка како што нормално добиваме во нашата сала, тоа ќе ни биде од голема помош. Се надевам дека луѓето ќе дојдат во вторник и ќе ни дадат поддршка. По враќањето на некои повредени ракометари, добиваме на стабилност. Имаме многу натпревари во овој период, но мора да размислуваме позитивно.

Го вративме ритамот, дури и во поразот во Берлин видов добри работи. Одигравме добро, посебно бевме добри при стрпливоста во нападот. Денес работевме некои детали кои ќе ни послужат за вторник, а и заштедив некои ракометари за дуелот против Мотор.  Веќе го подготвуваме дуелот против Украинците, ќе биде тешко и сериозно ќе ги сфатиме. Играа добро во последните натпревари, но имам позитивни вибрации за вторник“, изјави Валтер пред утрешниот натпревар.

Голманот Лесјак потсети дека со победа имаат шанси да бидат и на третата позиција, но најважно е што самите одлучуваат за својата судбина.

„Многу е важно што сами одлучуваме за нашата судбина. В раце имаме можност да стигнеме и до трето место во групата, што сега е наша цел. Екипата на Мотор е искусна, добар микс на зрели и млади ракометари. На гостувањето кај нив одигравме еден од подобрите натпревари и сакаме тоа да го повториме пред нашата публика.

Мотор е во форма, направи чекор напред и можеше тоа да се забележи и со победата над Бидасоа. Нам ни преостанува добро да се спремиме, да го прегледаме видео материјалот, да направиме тактичка припрема и да играме на победа.

Од денес до следната сабота играме четири натпревари и многу е важно да имаме голем ростер и играчите кои почнуваат од клупа, да внесат свежина. Тоа за секоја екипа е многу важно“, изјави Лесјак.

Натпреварот се игра утре во терминот од 20:45 часот во салата „Боро Чурлевски“.