Вагината не е имуна на протокот на времето – таа се менува, се прилагодува и старее. Хормоналните промени на кои се изложени жените со текот на годините влијаат врз нејзината функција, чувствителност и изглед, пишува „Е-клиника“.

Како вагината реагира на промените во естрогенот?

Зголемувањето на нивото на естроген предизвикува промени на вулвата и вагината уште во пубертетот (10-14 години): започнува растот на пубичните влакна, кои стануваат погусти и поковрџави. Кога жената влегува во перименопауза (во 40-тите и 50-тите години), телото почнува да произведува помалку естроген. Повеќето жени влегуваат во менопауза околу 52-годишна возраст. Намалувањето на естрогенот може да предизвика сувост на вагината и болка при интимен однос. Дополнително, намаленото либидо е честа појава поради замор, болка и стрес по менопаузата.

Вагината и ризикот од инфекции

Стареењето влијае на природната рамнотежа помеѓу добрите и лошите бактерии во вагината, што може да го зголеми ризикот од инфекции како бактериска вагиноза или уринарни инфекции. Ако почувствувате чешање или имате исцедок со непријатен мирис, задолжително консултирајте се со гинеколог – можно е да имате инфекција што бара третман.

Намалено либидо

Сексуалната желба (либидото) може да се менува со годините. Хормонските флуктуации предизвикани од контрацептивни таблети, бременост или менопауза може да влијаат на либидото. Истражувањата покажуваат дека некои жени на контрацепција во 20-тите и 30-тите години имаат понизок сексуален нагон. Либидото често го достигнува врвот во средината на 30-тите и почетокот на 40-тите години. Во перименопаузата, опаѓањето на естрогенот предизвикува сувост и тенка слузница на вагината, што доведува до болни односи и уште повеќе ја намалува желбата за секс.

Во постменопаузата, намалениот сексуален нагон е поврзан и со замор, болки во регијата околу јајниците и матката, како и хроничен стрес.

Слабење на карличното дно

Бременоста и породувањето ги растегнуваат мускулите на матката, особено карличното дно. Овие мускули ја поддржуваат бешиката, цревата, вагината и матката. Понекогаш може да дојде и до раскинување на карличното дно при породување. Сепак, вагиналните мускули се многу еластични и кај повеќето жени се враќаат во нормала.

Во перименопаузата, намалениот естроген го прави вагиналното ткиво помалку еластично. По менопаузата, опаѓањето на колагенот предизвикува опуштање на кожата – вклучително и на вулвата и мускулите на карличното дно.

Промени на пубичните влакна и клиторисот, што се случува со исцедокот?

Растот на пубичните влакна започнува во пубертет. Со стареењето, тие може да станат посиви и поретки. Клиторисот, пак, се намалува во менопаузата и по неа.

Вагината почнува да произведува исцедок уште во пубертет. Хормоните естроген и прогестерон значително варираат во доцните 20-ти и 30-ти години, што може да доведе до засилен исцедок и други промени.

Како да ги контролирате овие промени?

Сосема е нормално што вагината и вулвата се менуваат со возраста. Еве неколку совети како подобро да ги контролираат овие процеси:

• Примена на естроген (како крема или таблети – исклучиво по препорака на гинеколог)
• Редовни интимни односи – го зголемуваат протокот на крв и ја одржуваат вагиналната мукоза еластична и здрава
• Кегелови вежби – редовното практикување по породувањето го зајакнува карличното дно и го подобрува протокот на крв
• Откажување од пушење – никотинот го намалува нивото на естроген и протокот на крв во вагината
• Користење вагинални навлажнувачи – ја рехидрираат слузницата, спречуваат чешање, иритации и болни односи (се користат секојдневно или секои 2–3 дена)
• Користење лубриканти – го заменуваат природниот исцедок и го намалуваат триењето при односи

Доколку имате бенигни или малигни промени на дојките, не користете препарати со естроген во ниту една форма без консултација со лекар.