Родителите на учениците од ООУ Његош организирани преку иницијативен одбор за утре со почеток во 17.30 часот пред зградата на училиштето во Јурумлери најавуваат нов протест и ги повикуваат да им се приклучат сите родители.

Тие преку соопштение упатија порака до министерот за образование Јетон Шаќири дека ако ги одземе ингеренциите на општината ќе следува бојкот на наставата во сите основни училишта на територијата на Гази Баба.

-По заканите од Министерот за одземање на ингеренции, на нашиот иницијативен одбор се приклучија родители на ученици од сите останати основни општински училишта во Гази Баба кој даваат поддршка на нашите барања, соопштија родителите и додаваат дека повеќе од 10 дена на сила е целосен бојкот на наставата во ООУ Његош.

Иницијативниот одбор реагира што по минатонеделниот состанок на повик на градоначалникот на општина Гази Баба Бобан Стефковски на општина Гази Баба на која се сретнале со Министерот за образование и наука Јетон Шакири и му ги соопштиле барања директно и лично, со денови потоа немало слух и реакција од него, а вчера тој се заканил преку медиумите со ултиматуим и одземање на ингеренциите на општината.

Министерот за образование и наука Јетон Шаќири вчера вети дека повторно ќе се сретне со родителите на учениците од ООУ „Његош“ во Јурумлери за да се решат проблемите на учениците Македонци кои бараат услови за организирање на целодневна настава за нивните деца, како и нивна согласност 13 ученици Албанци од шесто одделение наставата да ја следат во училиштето, а не да патуваат со организиран превоз до селото Огњанци.

-Секое дете треба да оди на настава. Моето барање е да се најде привремено решение, за овие 13 деца кои не сакаат да патуваат, а не треба да останат без настава, мора да се најде решение. Општината заедно со директорот треба да достави проект за доградба на тоа училиште со 4 предавални и ние ќе обезбедиме буџетски средства за изградба на училиштето, едни да имаат целодневна настава, а другите да учат на својот мајчин јазик. Решението мора да биде долгорочно, дециден беше Шаќири.

Долгорочно решение на проблемот со паралелките на македонски и на албански наставен јазик е изградбата на новото училиште во село Идризово, но за него се уште нема одобрение од Министерството за транспорт и врски. Учебната година веќе трае цел месец, а поради бојкотот и неможожноста да се најде компромисно решение без настава останаа учениците од ООУ „Његош“.

Капацитетите на училиштето „Његош“ и оваа учебна година се преполнети и наставата се одвива во две смени. Нема ниту доволно наставен кадар, а внесувањето на нови паралелки без претходно проширување на објектот е невозможно, тврдеа родителите на последниот протест. Учениците Албанци настава следат само до петто одделение, а од шесто до деветто треба да патуваат по 13-14 километри до Огњанци.

Шаќири топката ја префрли кај градоначалникот на Гази Баба Бобан Стефковски и побара од него проект за проширување на училиштето кој би го финансирала Владата.