Кривичниот суд за утре во 12 часот ја најави пресудата против Зоран Милески, третообвинет во случајот „Рекет“.

Од тројцата обвинети во овој случај, само Милески денеска пред судскиот совет призна вина по однос на обвинителниот акт.

– Бидејќи обвинетиот ја призна вината, предлагам судот да го казни ценејќи ги сите околности – изјави обвинителката Вилма Русковска во завршниот збор во одвоениот процес за Милески.

Александар Новаковски еден од адвокатите на  обвинетиот Зоран Милески рече дека неговиот клиент бил вработен во компанијата на сведокот кој го пријавил ова кривично дело.

Новаковски рече дека со исказот на Милески даден во ОЈО многу се шпекулирало во јавноста.

– Тој е син единец и татко на пет малолетни деца. Таткото на Зоран е болен од карцином, и се надевам дека судот ќе ги цени овие факти, како и неговото признавање на вината – рече Новаковски.