Уставниот суд на Косово во четврток објави дека пратениците мора да ја завршат конститутивната седница на Собранието најдоцна во рок од 30 дена, со избор на претседател и потпретседател, објави РСЕ.

Констутивната седница на новиот парламентарен состав по изборите во февруари, започна на 15 април и досега се одржува по 37-ми пат, но пратениците не успеаја да изберат претседател и пет потпретседатели. Уставниот суд во својата одлука наведе дека конститутивната седница што започна на 15 април се смета за нецелосна бидејќи претседателот и потпретседателите сè уште не се избрани.

Според Уставниот суд, врз основа на член 66 од Уставот за избори и пратенички мандати, оваа седница требало да заврши во рок од 30 дена од официјалното објавување на резултатите од изборите.

На 27 март, Централната изборна комисија ги потврди резултатите од парламентарните избори одржани на 9 февруари.

„Судот оцени дека конститутивната седница на Собранието е уставен акт што мора успешно да се заврши во рок од триесет дена од официјалното објавување на резултатите од изборите, со исполнување на сите суштински елементи на уставот, што, по положувањето заклетва на пратениците, мора да се заврши со избор на претседател и потпретседател“, се наведува во одлуката на Уставниот суд.

Случајот беше упатен до Уставниот суд од страна на пратениците на Алијансата за иднината на Косово и неколку други пратеници кои беа во опозиција во претходниот мандат.

Нивното барање се однесуваше на оценката на уставноста на промената во методот на гласање воведена од претседателот на конститутивната седница, Авни Дехари – тајно гласање наместо отворено гласање за избор на претседател на Собранието. Сепак, Уставниот суд не одлучи за законитоста на одбивањето на тајното гласање.

Уставниот суд наведе дека мандатот на пратениците и мандатот на Собранието се меѓусебно поврзани и дека пратениците не можат да го претставуваат народот без да го конституираат Собранието. Во врска со конституирањето на Собранието, во пресудата се наведува дека сите пратеници мора да гласаат.