Обезбедување континуирано снабдување со топла вода, решавање на проблемите со лифтовите, подобрување на квалитетот на храната, одржување на собите и тоалетите и решавање на проблемите со електричната енергија, се барањата на Универзитетското студентско собрание на УКИМ (УСС-УКИМ) и Комисијата за студентски стандард и Студентскиот совет на станари за студентите кои се сместени во студентскиот дом Пелагонија.

На денешнат средба со директорката на студентскиот дом, како што информира Универзитетското студентско собрание на УКИМ, бил презентиран акциски план за итни подобрувања, изработен од Советот на станари и УСС-УКИМ.

– Го поздравуваме конечното решавање на проблемот со назначување на директор и поставувањето на в.д. директор од редовите на вработените во домот, наспроти последната досегашна пракса, каде беа бирани лица кои со недели не се појавувале на работа. Во овие две недели, санирана е хидрофорната пумпа со што е обезбедена топла вода за студентите, се санираат дефектите со лифтовите и се очекува во текот на овој месец да бидат функционални два, а од јануари трите лифта во домот, во завршна постапка е набавката на доволна количина на месни производи и ќе биде отпочната постапка за решавање на проблемот со интернетот во домот, стои во соопштението.

Барањата се претставени во акцискиот план и соодветна евалуација ќе биде извршувана од страна на Советот на станари и Комисијата за студентски стандард при УСС-УКИМ.