Кајакарите на К.К.К Арка-Борец од Велес и членови на македонската сениорска репрезентација во спуст викендов учествуваа на 3-тото коло од Европскиот куп во Даленвил, Швајцарија.

На европскиот куп се возеа два натпревари, во дисциплината класик на патека долга 4,5 км и дисциплината спринт со должина од 500 метри.

Во настапот на класичните возења македонските кајакари успеаа да се закитат со еден медал во категоријата М35+ каде што второ пласиран заврши Љубомир Спасиќ, додека во сениори Александар Златаров беше на 15то место и во јуниорска У18 категорија Кристијан Лазаров заврши 7-мо пласиран, а Благој Гугинов беше 10-ти во категоријата У16. Во тимскиот настап во сениори во состав Спасиќ-Златаров-Лазаров остварија пласман на 5-то место.

Македонските кајакари беа далеку поуспешни во настапите во спринт каде што Благој Гугинов во јуниори У16 се пласираше на 2-то место, во сениорскиот тимски настап (Спасиќ-Златаров-Лазаров) го освоиа 2то место и Љубомир Спасиќ во категорија М35+ заврши на 2то место.

Со завршување на 3-то коло на Европскиот куп генералниот пласман остана непроменет во сениорска и јуниорска категорија каде што во сениорите првите две места ги држат Златаров и Спасиќ, а кај јуниорите ги држат Лазаров и Гугинов.

Предстојат уште две кола од Европскиот куп каде по нивното завршување ќе биде познат официјалниот генерален пласман за 2023.