Земјотрес со јачина од 5,2 степени според Рихтеровата скала денес го погоди источен Авганистан, соопшти Американскиот геолошки завод (USGS). Епицентарот бил 34 километри североисточно од градот Џалалабад, во покраината Нангархар, во близина на зоната што викендов беше погодена од силен потрес со јачина од 6,0 степени.

A magnitude 5.2 earthquake strikes eastern #Afghanistan near the epicenter of a powerful quake that killed more than 1,400 people, according to the US Geological Survey. pic.twitter.com/FdoXS5d6i3

— Al Arabiya English (@AlArabiya_Eng) September 2, 2025

Талибанските власти соопштија дека во земјотресот од викендот загинале најмалку 1.400 луѓе, додека илјадници останале без покрив над главата. Села изградени од калливи тули и дрво беа уништени, а многу жители останаа заробени под урнатините.

Спасувачките операции се одвиваат во исклучително тешки услови поради непристапниот терен. Талибанските власти соопштија дека биле принудени да исфрлат десетици командоси од авиони за да евакуираат повредени лица од области каде хеликоптерите не можат да слетаат.

Координаторката на ОН за Авганистан, Индрика Ратвате, предупреди дека бројот на жртви може дополнително да расте и нагласи дека ситуацијата е „трка со времето“, пренесува Ал Џезира. Таа апелираше до меѓународната заедница да не ги заборави луѓето во Авганистан, кои веќе се соочуваат со сериозни економски, хуманитарни и безбедносни кризи.

„Ова е прашање на живот и смрт додека се обидуваме да стигнеме до најпогодените заедници“, изјави Ратвате.