30-годишен државјанин на Турција, градежен работник кој настрадал работејќи на објект во центарот на Скопје, бил пренесен во Клиничкиот центар со тешки повреди, соопшти полицијата.

„На 19.12.2022 во 17.20 часот во Полициската станица Центар било пријавено дека во Комплекс клиники „Мајка Тереза” со тешки телесни повреди бил донесен К.Ш.(30) од Република Турција, со престој во Скопје“, се вели во полициското соопштение.

Според пријавеното, тој се здобил со повредите додека извршувал работни задачи на објект во изградба на подрачје на Центар-Скопје. На местото на несреќата бил извршен увид и полицијата презема мерки за расчистување на случајот.

Само од почетокот на годинава, во полициските билтени имаше информации за повеќе од десет повредени градежни работници од Турција, кои настрадале работејќи на објекти кои се градат во центарот на Скопје.