На 22 април на полноќ финишира предизборната кампања за претседателските избори. Седумте кандидати имаат уште четири дена да ги претстават програмите и да ветат на граѓаните што би сработиле доколку ја добијат довербата на 24 април и 8 мај. Некој ветува влез на ЕУ до 2030 година, друг пак излез од НАТО и влез во БРИКС, има кандидати на кои фокус им е борбената подготвеност на државата и вложување во оружје и муниција, некој сака да ја врати гордоста а други пак сакаат идните претседателски избори да се одржат во Парламентот односно шефот на државата да го бираат пратениците. Кандидатите со слични цели но различни планови за иднината на Македонија.

Кандидатот поддржан од СДСМ Стево Пендаровски вели дека Македонија нема нови години за губење.

„Добро е да се биде членка на ЕУ, кога си земја членка на ЕУ, добиваш огромни средства од европските фондови прво за земјоделство, а потоа и за инфраструктура. ЕУ дава сериозни пари за да се обезбеди рамномерен регионален развој за да не биде некој регион многу богат, а некој многу сиромашен и поради тоа важно ни е да станеме земја-членка на ЕУ“ порача Пендаровски.

Правна држава со силни институции, преговори со Европската унија но да не дозволиме нестандардни услови за Македонија во евроинтегративниот процес – вети кандидатката од ВМРО-ДПМНЕ Силјановска Давкова.

„Нема гордост без национални и државни интереси. Македонија не треба само да молчи пред европските челници за нестандардните услови на патот кон ЕУ, туку треба да не почитуваат исто како што ги почитуваат другите земји членки и кандидати. Таа посочи и дека актуелната власт не ужива углед. Затоа овие луѓе не уживаат углед и не може да ја претставуваат Македонија, не само добро, а камоли подобро и затоа Македонија не може на нив да биде горда“ – рече Силјановска Давкова.

Кандидатот од ГРОМ Јакимовски обвини дека ВМРО- ДПМНЕ би направиле коалиција и со „црниот ѓавол за да се доберат до буџетот на државата“. Оваа реакција, вели, е поради тоа што и ВМРО-ДПМНЕ и СДСМ не реагирале на „уцените на ДУИ и ВРЕДИ за уставните измени“.

„Јас не можам да се изначудам зошто нема никаква реакција од кандидатот Доналд Реган, ниту пак од господинот Стево Пендаровски. Ај што тие не реагираат на овие уцени, но уште повеќе не можам да се изначудам како може да нема реакција ниту од ВМРО-ДПМНЕ, ниту од Мицкоски, ниту од Ковачевски, ниту од СДСМ. Практично се гледа дека водат ноевска политика, односно, главата е ставена во песок и на овие закани и на овие уцени никако не одговараат“, рече Јакимовски.

Кандидатот на ДУИ и Коалицијата, кој во битка за Вила Водно влезе под слоганот „Европски претседател“ вели дека Европскиот фронт е „голема идеја што ги собра соништата на секој граѓанин“.

„Европскиот фронт не е политичка партија. Европскиот фронт не е ни коалиција на политички партии, Европскиот фронт е голема идеја. Тоа е одлична идеја чие време дојде, лавина што ги собра соништата на секој граѓанин на оваа земја, за еднаквост, за правда и просперитетен живот во ЕУ. И ова го гледам како ентузијазам, како насмевка во секое населено место каде што одам, бидејќи Европскиот фронт е трета унија, но сега со малку поинаква димензија“, истакна Османи.

Билјана Ванковска најмногу се залага за носење на нов граѓански устав, влез во БРИКС и излез од НАТО.

„Ние не можеме да веруваме дека ЕУ е трајно нешто. Таа се менува. Во Германија, јавноста веќе притиска за излегување од ЕУ. Јас сум за трезвено гледање на работите. ЕУ менторството е во ред, но не да бидат владетели во оваа држава. НАТО го ветуваа како економска бонаца, ќе бидеме безбедна дестинација… Само за овие неколку години, за воена опрема и оружје имаме потрошено повеќе од 34 пати во сума, во пари, за да покажеме колку сме лојални, притоа одземајќи од социјалните потреби на граѓаните. Нашата алтернатива е воена неутралност. Ја не сакам Македонија да биде ничиј геополитички плен“, изјави Ванковска.

Кандидатот на Вреди вети затворање на сите казина и обложувалници, на оние кои земале брзи кредити ќе им се простат долговите. Исто како Османи, бара претседателот да се бира во Собрание и уставни измени во првите шест месеци по формирањето на новата влада.

„Во Македонија граѓаните трошат околу 1,7 милиони евра дневно во игри на среќа. Овие пари ги полнат џебовите  на руските и српските олигарси а преку нив и на моќниците од ДУИ. Болеста наречена игри на среќа ја инсталира и промовираше ДУИ на секој чекор во нашите населби. Оваа болест кој се симболизира со лотаријата на Артан Груби, ги уништува нашите семејства, го уништува нашето општество“, рече Таравари.

Ако сакаме Македонија конечно да оди напред потребно е обединување, но не обединување само на граѓаните туку и на власта и опозицијата. Максим Димитриевски кој се залага Македонија на влезе во ЕУ но со крената глава, а не понижена, смета дека е потребно граѓаните да изберат лидер, татко на нацијата, со интегритет, кредибилитет и карактер.

„Не има грст народ овде, и доста е од поделби. Доста се делиме. Ни треба обединување, на Македонија и треба обединител. Македонија нека гласа за другар, соговорник, соборец претседател. Мора да продолжиме на патот на евроинтеграциите, но не по секоја цена, бидејќи мора да влеземе во Европската унија со крената глава како Македонци и како засебна нација, како што била и како што е во моментот по основните заложби на Крушевскиот манифест. Се одважив, влегов во оваа битка за иден претседател на државата затоа што сметам дека Македонија заслужува претседател од граѓаните, со граѓаните и за граѓаните. И затоа мојот приоритет во иднина ќе бидат единствено граѓаните“ – порача претседателскиот кандидат на „ЗНАМ за наша Македонија“, Максим Димитриевски.