Управниот одбор на Ракометната федерација на Македонија ја потврди одлуката на претседателот на РФМ, Живко Мукаетов да им се додели премија од 20.000 евра на ракометарите за големата победа над Данска.
Вчера ракометната репрезентација на Македонија со 33:29 го совлада актуелниот светски шампион Данска, а на селекторската клупа дебитираше Кирил Лазаров.  Управниот одбор исто така го потврди и реизборот на Филип Милошевски за генерален секретар на РФМ.

„Ве информираме дека Управниот Одбор на Ракометната Федерација на Македонија, согласно Член 35 од Статутот поради итност на донесување на одлука согласно Член 3 точка 11 “Одлука без присуство” од Законот за здружение и фондации (Сл. весник на РМ бр. 52 од 16.04.2010 год.) на ден 12.03.2021 год. донесе Одлука за доделување парична награда во износ од 20.000 ЕУР нето (во денарска противредност) на сениорската машка ракометна репрезентација за извојуваната победа против актуелниот светски и олимписки шампион, селекцијата на Данска, натпревар одигран на ден 11.03.2021 год. во рамките на квалификацискиот циклус за пласман на ЕП 2022. Дополнително по објавениот конкурс за избор на Генерален секретар, Управниот Одбор на РФМ го усвои предлогот на комисијата и на функцијата Генерален секретар го назначи г-дин Филип Милошевски“, стои во соопштенито на РФМ.