Присилното раселување протера повеќе од милион луѓе од градот Рафах во Газа, соопшти денеска Агенцијата за палестински бегалци на Обединетите нации (УНРВА).

Малиот град на крајниот југ во Појасот Газа е засолниште на околу милион Палестинци кои побегнале од израелските напади во другите делови на енклавата, според хуманитарните организации.

Од почетокот на мај, израелската војска спроведува ограничена операција во Рафах за да ги искорени борците на Хамас и да ја разбие инфраструктурата што ја користи палестинската исламистичка милитантна група која владее со Газа.

Израелската армија им порача на цивилите да одат во „проширената хуманитарна зона“ оддалечена околу 20 километри.

Многу Палестинци се пожалија дека се изложени на израелски напади каде и да одат, и да се движат по Појасот Газа во последните месеци.

УНРВА соопшти дека илјадници семејства сега се засолниле во оштетените и уништени објекти во градот Кан Јунис, каде што агенцијата обезбедува основни услуги и покрај „сè поголемите предизвици“.

-Условите се неописливи, нагласи агенцијата.