Универзитетската клиника за урологија во Скопје стана првиот јавен здравствен центар во Македонија кој изведува операции за поставување на вештачки уринарен сфинктер, процедура која досега беше достапна само во странство или во приватни клиники.

Како што соопштуваат од Клиниката, интервенциите ги изведува виш научен соработник д-р Огнен Ивановски, кој првите операции ги реализирал под менторство на проф. д-р Сергеи Котов од московската Клиника Пирогов.

Досега се изведени десет успешни интервенции, со што Клиниката се вбројува меѓу ретките лиценцирани центри за оваа процедура во регионот.

Операцијата е наменета за пациенти со уринарна инконтиненција, состојба која најчесто се јавува по хируршко отстранување на простатата поради карцином.

Вградувањето на сфинктерот значително го подобрува квалитетот на живот и е целосно покриено од Фондот за здравствено осигурување.