На подрачјето на Трст и Јадранското Море започна изградбата на унгарско пристаниште, кое треба да биде оперативно до 2028 година. Оваа информација ја потврди државниот секретар на МНР, Левенте Маѓар. Ќе се гради огромен дел од 50.000 кубни метри морски ѕид и насип на унгарско државно земјиште во Северна Италија, изјавија извори од градилиштето.

„Во првата фаза ќе се изгради 250-метарски дел од брегот, кој ќе се прошири за околу 400 метри, со што Унгарија ќе добие вкупно 650 метри крајбрежје на Јадранот“, рече Маѓар. „Откако го загубивме унгарското пристаниште Риека пред 107 години, нашата земја повторно ќе има излез на море – во Трст започна изградбата на независно унгарско пристаниште. Развојот, кој носи сериозни можности за унгарската економија, започна по неколкугодишни подготовки“, рече тој, објави Кликс.ба.

Тој објасни и што ќе значи изградбата на пристаништето за унгарската економија. „Годишниот унгарски извоз на стоки ќе расте и стоките полесно ќе стигнуваат до светскиот пазар. Побрза, поефикасна и појасна логистика за унгарските компании. Инфраструктура погодна за преработка на 2,5 милиони тони стока годишно. Ѝ благодарам на италијанската влада за соработката“, рече Маѓар. Како што пренесува Хангари Тудеј, во летото 2019 година беше откриено дека Унгарија ќе изгради пристаниште во Трст. Државата ја доби оваа површина за 31 милион евра како дел од 60-годишен договор за концесија.