Украинскиот парламент ја продолжи воената состојба и општата мобилизација во Украина за уште 90 дена, до 5 ноември 2025 година, објави пратеникот од партијата „Голос“ Јарослав Железњак.

„Радата гласаше за два закона… Продолжувањето на воената состојба беше поддржано од 320 пратеници, а мобилизацијата од 304. Еден пратеник (Олексиј Гончаренко) беше против“, рече Железњак на Телеграм, пренесува РБК Украина.

Парламентот гласаше за продолжување на воената состојба и општата мобилизација по 16-ти пат од почетокот на војната во Украина.

Претходно, на 14 јули, украинскиот претседател Володимир Зеленски поднесе до Парламентот два закона за продолжување на воената состојба и општата мобилизација.

Шефот на државата му предложи на парламентот да ја продолжи воената состојба и мобилизацијата за 90 дена, од 7 август до 5 ноември 2025 година.