Бугарската Нова ТВ, известува за бум во трансакциите со недвижности во Несебар – во 2022 година секој ден во општината се продавале по 27 имоти, правејќи над 10.000 трансакции. Ова е своевиден рекорд за последните 15 години.

„Несебар е комбинација од урбана инфраструктура и има се што е потребно за живот. Луѓето кои доаѓаат да живеат тука имаат удобности како училиште, болница, градинки, многу продавници и живеат во текот на целата година. Од една страна, тоа е туристички град, но од друга – полноправно целогодишно гратче за добар живот“, објасни брокерот Љубов Гордеева.

Растот е 37 отсто во однос на претходната година.

„Имаше сериозен бум во потрагата по инвестициски имоти. Се купуваа двособни станови. Цената беше од 30 до 50.000 евра. Главни купувачи биле Бугарите кои купувале за инвестиција. Имаше зделки и за студиа, при што цената беше од 20 до 40.000 евра.Тоа ги привлекува клиентите во малите населби, бидејќи цените се прилично ниски во споредба со другите градови. Инвестицијата во недвижен имот е многу добра“, додаде брокерот Елена Тончева.

Во моментов имотите главно ги продаваат Бугари кои пред извесно време ги купиле по пониски цени. Русите се веќе помалку, поради тешкотиите во плаќањето на становите. Брокерите веруваат дека цените нема наскоро да паднат на нивоата од претходните години, прво затоа што побарувачката ја надминува понудата и второ – поради профилот на самите купувачи, од кои голем процент моментално се Украинци.